Tien maniere om jou angs in toom te hou tydens nasionale afsondering

Dis normaal vir enige iemand om angstig te voel tydens die COVID-19-pandemie. Maar as jy reeds ʼn angstige persoon voor die koronavirus was kan dit moeilik wees om jou angs tydens die landswye afsondering in toom te hou. Daar is egter ʼn paar dinge wat jy kan doen om jou angs te beheer.

1. Stof jou boeke af

Nou is die beste tyd om die hoop boeke wat langs jou bedkassie stof vergader deur te werk. Nie net kan Deon Meyer se nuutste roman jou gedagtes van die huidige situasie afvat nie, maar studies het bewys dat net ses minute van lees jou hartklop verlaag en jou spiere laat ontspan. Vermy dalk net boeke oor virusse of pandemies vir tyd en wyl.

2. Oefen aanlyn

Ons almal weet dat oefen belangrik is. Nie net vir ons fisiese gesondheid nie, maar ook vir ons geestesgesondheid. Maar hoe gemaak as die gimnasium toe is en jy nie buite mag gaan draf nie? Baie gimnasiums bied klasse aanlyn aan en YouTube het verskeie video’s van amper elke oefening verniet beskikbaar. As jy nog ou aerobiese DVD’s het, is nou ʼn goeie tyd om dit uit die kas te gaan grou. Die oefeninge alleen sal nie net jou gemoed verbeter nie, maar die uitrustings (en haarstyle) uit die 1980’s sal definitief sorg vir ʼn glimlag op jou gesig.

3. Hou jou (joga)-pose

Terwyl oefening goed is, is dit nie net intense oefening wat jou kan help om jou angs te beheer nie. Joga verbeter jou liggaam se vermoë om stres te verwerk en kan jou help ontspan. Yoga with Adriene bied verniet video’s vir beginners op YouTube.

4. Luister na Matthew Mcconaughey

Net soos joga kan meditasie jou help om op jou asemhaling te fokus en in die oomblik te wees. Om elke dag ʼn paar minute stil te sit sal help om die negatiewe gedagtes wat in jou kop rondmaal stil te maak. Daar is ʼn hele paar slimfoontoepassings soos Calm en Headspace wat meditasies verniet aanbied. Calm het ook slaaptydstories vir grootmense. So, jy hoef nie snags te lê en bekommer nie. Matthew Mcconaughey se stem kan jou na droomland toe vat.

5. Probeer kreatiewe terapie

Inkleurboeke is nie net vir kinders nie. Navorsing het bevind dat die inkleur van ‘n redelike ingewikkelde meetkundige patroon ‘n meditatiewe toestand tot gevolg kan hê. As jy angstig is kan die inkleur van ingewikkelde patrone tot jou voordeel strek, so leen jou kinders se helderkleurige potlode en begin inkleur.

6. Leer jou hond (en jouself) nuwe toertjies

Hoe meer tyd jy het om te dink hoe makliker is dit vir negatiewe gedagtes om ʼn houvas te kry. Gebruik hierdie landswye afsondering om ʼn nuwe vaardigheid aan te leer. Udemy het baie kursusse teen bekostige pryse. Leer kodering, plant ʼn groentetuin (as jy bekommerd is oor kosvoorraad), of leer jou hond nuwe toertjies.

7. Praat oor jou bekommernisse

Dis maklik om eensaam te voel tydens isolasie, maar maak ʼn punt daarvan om met vriende en familie te gesels. As jy angstig voel, gesels oor jou bekommernisse. Om oor jou gevoelens te praat kan help om jou angstigheid in perspektief te hou. Toepassings soos Skype of Zoom maak dit moontlik om in kontak te bly.

8. Reis

As dit voel of die huis se mure jou begin druk, is dit tyd vir ʼn uitstappie. En, al mag jy nie by die hek uitgaan nie, kan jy steeds die wêreld sien. Neem ‘n virtuele toer. Loop op die Groot Muur van China of wandel deur bekende museums soos die Guggenheim Museum in New York, die Musée d’Orsay in Parys of die Van Gogh Museum in Amsterdam.

9. Moenie (alles) lees nie

Terwyl wenk 1 sê dat lees jou kan help ontspan is die tipe leesstof egter baie belangrik. Moenie alles lees wat jy op die internet of sosiale media sien nie. Dis maklik om angstig te voel as jy gereeld nuus oor die koronavirus (COVID-19) lees. Vermy dit sover as wat jy kan. Vra eerder ʼn familielied om jou op hoogte te hou van die belangrikste nuus.

10. Kyk na jouself met deernis

Kyk na jouself met deernis. Dis normaal om angstig te voel. Nie een van ons het onsself al in ʼn wêreldwye pandemie bevind nie. Probeer die wenke hierbo om jou angs in toom te hou en vat dit een dag op ʼn slag.

As jy nog wenke het, deel dit gerus in die kommentaarblokkie onder.